شاه ايسماييل پولئميکاسينا ايراندان شلاله جاوانشير ده قوشولدو
"بيزيم دينيميز موقدس ايسلامدير. ايسلام آدام اتي يئمگي
ياساقلاميشسا، دئمک کي، شاه ايسماييل موسلمان دا اولماميشدير. اورتايا
آتيلميش تصادوفي بير شخصدير. ايسلاملا، عيرفانلا، تسوووفله ده هئچ بير
علاقه سي اولماميش..."ايراندان "اوخو زالي"نا يوللاديغي بو مقاله‌سي ايله يازار شلاله جاوانشير آچديغيميز "صفوي پولئميکاسي"نا قوشولور. پولئميکا گونتاي گنجالپين "صفويلر" کيتابينين ("قانون") چاپيندان سونرا باشلانيب.
شلاله جاوانشير
(ردبيل)
تاريخين قارانليغيندا يانديريلان شام
(گونتاي گنجالپين "صفويلر" کيتابي اوزرينه)
صفويلر کيتابينين اينتئرنئت اورتاميندا ياييلميش عرب اليفباسي واريانتيني اوخودوم. کيتابا وئريله‌جک تپکيلر مني چوخ ماراقلانديريردي.
آزادليق راديوسونون "اوخو زالي"ندا باشلاديلان موزاکيره‌لري قاچيرمادان ايزله‌ديم. هم کيتابلا باغلي يازيلان مقاله‌لري، هم ده مقاله‌لره يازيلان کوممئنتلري.
سونرا قرارا گلديم کي، من ده کيتابلا باغلي اؤز فيکيرلريمي يازيب "اوخو زالي"نا گؤندريم.
اؤنجه باشلانقيجدا سؤيلگيم کي، من آنا ديليمده تحصيل آلماديغيم اوچون ديليمده بعضي عکسيکليکلر اولا بيلر. بونا گؤره اوخوجولار مني باغيشلاسينلار.
فيکيرلريمي آچيقلاماق اوچون يازيما مؤولانه جلالددين رومينين "مثنوي" اثريندن بير آلينتي ايله باشلاياجام.
مؤولانه مثنويسينده آنلادير کي، هينديستانليلار بؤيوک بير فيلي قارانليق بير داما ساليرلار. جار چکيرلر کي، کيم فيل گؤرمک ايسته‌ييرسه گلسين. عؤمرونده فيل گؤرمه‌ميش آداملاردان پارا آليرلار کي، گيريب بو قارانليقدا فيلي گؤرسونلر.
آداملار بير-بير ايچري گيريب ديشاري چيخديقلاريندا فيلين نه اولدوغونو اهالييه آنلاديرلار. فيلين قيچينا توخونان آدام دئيير کي، فيل ديرک کيمي بير شئي ايميش! فيلين قولاغينا توخونانسا دئيير کي، فيل يئلپج کيمي بير شئي ايميش، هاوا ايستي اولدوغوندا اونونلا اؤزوموزو يئلله‌ييب سرينله‌ده بيلريک. فيلين خورتومونا توخونان دا دئيير کي، فيل نوودان کيمي بير هئيوان ايميش. فيلين بئلينه اليني سورن آدام ديشاري چيخديغيندا دئيير کي، فيل تاختادان ياتاق کيمي بير شئيدير، اوستونده اوزان يات. بيري ده فيلين قويروغونا توخونور و دئيير کي، فيل دئييلن شئي ايپ ايميش.
هر کس فيلين هاراسينا توخونورسا حيسئتديگي کيمي آنلادير. سونرا دا فيله توخونوب ديشاري چيخانلار بير-بيرلري ايله قؤوقا ائديرلر کي، سن بيلميرسن فيل ندير. ديگري دئيير کي، يوخ، سن يانليش آنلاتدين، سن هئچ فيلي گؤرمميسن. مؤولانه نتيجه آلير کي، حيس اين گؤزلري الين ايچي کيميدير. الين ايچينه فيل تام اولاراق سيغماز. اونلارين بيرينده عاغيل اولسايدي، بير شام يانديراراق او قارانليق داما گيرمه‌لي ايديلر. شامين ايشيغيندا فيلين نه اولدوغونو گؤره بيلرديلر.
ايندي گونتاي گنجالپين "صفويلر" کيتابي اصلينده او قارانليق دامين ايچينده بير شام ياخميشدير. فيلين نه اولدوغو گؤرولموشدور. فيله قارانليقدا توخونوب نه اولدوغونو آنلاييب آنلادانلارين دونياسي داغيلميشدير. چونکي گئرچک فيل اونلارين آنلاتديقلارينين هئچ بيريسي دئييلميش. گونتاي گنجالپين "صفويلر" کيتابينا گؤستريلن تپکيلر ده بو شکيلده‌دير. اينسانلار شامين ايشيغيندا گؤرولن فيلي قبول ائتمک ايستميرلر. اؤز اساسسيز اينانجلاريندان واز کئچمک ايستميرلر.
تاريخي اولقولاري رسمي ايدئولوژيلرين دار باجاسيندان باخاراق اينجله‌مه‌يه چاليشان آراشديرماچيلار اوچون بير فئنومئنين پلوراليست (چوخيؤنلو) آچيقلانماسي قبول ائديلمزدير. اونلار اوچون تاريخي گئرچک دئيه بير شئي يوخدور.
اونلار اؤز تصوورلرينده‌کيخياللاري تاريخي گئرچکليک کيمي گؤرمکدن خوشلانارلار. تاريخي ياشانيلان سونراکي چاغلارين سياسي و دويغوسال احتيياجلارينا گؤره اينجله‌مکله گئرچکلري بيلمک مومکون اولا بيلمز.
"صفويلر" کيتابينا سرت تپکي گؤسترنلرين اورتاق نؤقته‌لري بودور کي، صفويلر آذربايجانين بوتؤولوگونون اساسيني قويموش، بؤيوک آذربايجان دؤولتي قورموشلار! و اونا توخونماق، او دؤنمه تنقيدي ياناشماق دوغرو ساييلماز.
شاه ايسماييل آذربايجان ايمپئراتورلوغو قورموشدور! بئله بير شئي اولموشمو گئرچکدن؟ آذربايجان وطنداشلاري بلکه بير تور آشاغيليق کومپلئکسي ياشاماقداديرلار و بو يوللا آشاغيليق کومپلئکسيني گئدرمک ايسته‌ييرلر.
شاه ايسماييلين آذربايجان ايمپئراتورلوغو قورما عملينين نتجه‌لريني ندن ايراندا ياشايان بيزلر اصلا حيسئتميريک؟ حيسئتديگيميز باشقا شئيلردي. بو دوغرولتودا الي شرعيتينين "الي شيسي و صفوي شيسي" کيتابي چوخ ديقت چکيجيدير. صفويلر اصلينده شيه اينانيشينا دا ضرر وئرميشلر.
حتّي بونلار دوغرو اولسا بئل، يني شاه ايسماييل آذربايجان ايمپئراتورلوغو قورصا دا (کي، يالاندان باشقا بير شئي دئييلدير) آزاد دوشونجه‌نين تنقيدي ياناشماسينين اؤنونو کسمک اولماز. آزاد دوشونجه تاريخدن اوستوندور، تاريخدن اؤنمليدير.
آزاد دوشونجه‌ني تاريخين جاهيل دؤنملري اؤز اسارتي آلتينا آلا بيلمز، آلماماليدير. مودئرن اينسانين دوشونجه‌سيني صفوي باتاقليغي يؤنلنديرممه‌ليدير. آذربايجان جومهوريتي سون ايکي عصرده صفوي تاريخي موحيطيندن و حيات شکليندن بؤيوک اؤلچوده اولماسا دا، قيسمن آيريلميش، قوپموشدور.
او کولتورل موحيطل، آنجاق خيال و تصوورلرله ايرتيباط قورماغا چاليشيرلار. غورورلا اؤزلريني قيزيلباش آدلانديريرلار. سانکي قيزيلباشليق بشريت اوچون بير آيدينليق چاغي اولموشدور.
قيزيلباشلاري صيرف تورک اولدوقلاريندان اولولاييرلار. آنجاق تورک اولمالاري اونلارين پيس ايشلر ائتميه‌جکلري آنلاميندا دئييلدير. زاتن تورک تاريخيني و تورک عاقيبتيني قارانليغا گؤمن تورکلر اؤزلري اولموشلار.
باشقا ميلتده سبب آختارماق يانليشدير، آنلامسيزدير. آذربايجان اؤلکه‌سي وطنداشلارينا سانکي تاريخدن بير ايمپئراتورلوق لازيم اولدوغو اوچون صفويلري ايدئاليزه ائتمه تمايولو اورتايا چيخميش. آنجاق اونلار صفوي حيات شکلينين،
سفوي سوسيال پسيکولوژيسينين نه اولدوغونو ياشانتي اولاراق بيلميش اولسالار، نينکي صفويلري سئومز اولارلار، هم ده صفويلردن حيصه ن و فيکرن اوزاقلاشارلار. 21-جي عصرده دونيوي قانونلا تعليم-تربييه آلان آذربايجان وطنداشلارينين صفويسئورليگي چوخ دوشوندوروجودور.
بئله آنلاشيلير کي، آذربايجان اؤز گله‌جگيني سئومک، اونا قوووشماق ايستمير، آذربايجان صفوي قارانليغينا گؤمولمک ايسته‌يير. "صفويلر" کيتابي ايس، بو خيالين يانليش، يالان و باطيل اولدوغونو کيچيک شام يانديراراق گؤسترير.
البتته کي، اوزون ايللر بويو صفويليگي يالانلارا بورويه‌رک منيمسه‌ميش توپلوم اوچون بو گئرچگي قبول ائتمک چوخ چتيندير. آذربايجان وطنداشلاري ايلک اوخولدان سونا قدر صفوي حسرتي، صفوي هئيرانليغي ايله يئتيشديريلميش. بونا سووئت ايدئولوژيسي ده مانع اولماميش.
چونکو سووئتلرين "پارچالا حؤکم سور" ايدئولوژيسينه بو، چوخ ياخشي خيدمت ائديردي. بوتونويله موسکوا باغيملي اولان پيشورينين 1945-جي ايلده قيزيلباش اوردوسو تسيس ائتمه‌سينه ستالينين خوشگؤرو ايله باخماسي دا بو اوزدن ايدي. سووئتلر 1945-جي ايلده صفوي محورلي ميللي کيمليگين يوکسه‌ليشينه ايذن وئريردي. بونون اؤنجه‌سينه و اؤتسينه چيخماسينا ايذن وئرمزديلر، وئره‌مزديلر.
"قيزيل باش" و "قيزيل اوردو" آنلاييشلاري هماهنگ ائديلميشدي. بو باخيمدان آذربايجان وطنداشلارينين گونتاي گنجالپين "صفويلر" کيتابينا گؤسترديکلري تپکيلر آنلاشيليردي. چونکو بئيينلره دولدورولموش يالانلار ايفشا ائديلير. چونکو گئرچک فيل گؤرونمه‌يه، گؤستريلمه‌يه باشلاميش و اينسانلارين تلقين ائديلن دونيالاري داغيلميشدير.
آذربايجان شاعيرلرينين شئيرلرينده دئييلديگي کيمي هئچ ده شاه ايسماييل بير الينده ساز، بير الينده کيتاب اوزان کيمي دولاشماميش. عوموميتله شاه ايسماييل ساز چالماغي باشارماميش، تورک ساز کولتورونون يايغين اولدوغو اورتامدا يئتيشمه‌ميشدي. گيلاندا تورک سازي هاردا ايدي؟ و
"بو گون اله آلماز اولدوم من سازيم
عرشه ديرک-ديرک چيخار آوازيم" -
کيمي شئيرلر "صفويلر" کيتابيندا ايديعا ائديلديگي کيمي شاه ايسماييلا عاييد دئييل، عاييد اولا بيلمز. بونلارين هاميسي کيتابدا وورغولانديغي کيمي آنادولو اوزانلارينا، آنادولو خطايلرينه مخصوصدور.
فاناتيک دوشونمه‌نين و تاريخه فاناتيک باغليليغين يارارلي اولماديغيني چاغداشلاشما تاريخي ايثباتلاميشدير. تک چاره‌ميز چاغداشلاشماق دئييلمي؟ چاغداشلاشمانين آيدينلانما سورجينده تاريخه فاناتيکجه باغلانمانين بير آنلامي اولماز.
تاريخپرستليک اينکيشافين اؤنونده انگلدير. تاريخه بوت کيمي سجده ائتمک گرک دئييل، او، بيلگي اولاراق بيلينمه‌ليدير. بيلينن بيلگيلرين چاغيميزدا کئچرلي اولوب-اولماماسي باشقا مؤوزودور. آذربايجان اؤلکه‌سينده صفويليک بيلگي دئييلدير.
تبليغاتدير. "صفويلييه باغلان و کيمليک قازان" گؤروشو اينسانلارين شوورالتينا يئرلشديريلميش. بو نؤو اينسان هئچ بير زامان چاغداشلاشا بيلمز. ديالوقا آچيق اولماز. چونکو اونون قازاناجاقلاري گله‌جکده دئييل، صفويلر آدلي کئچميشده‌دير. صفويلر ايسه ايدئاليزه ائديلمک يئرينه علمي يؤنتملرله آراشديريلماليدير.
اؤنجه‌دن حاضير ايدئاللارلا صفوي سئيرينه چيخماق مودئرن اينسان تيپينه ياراشمايان بير دورومدور. آداما سورمازلارمي کي، ايدئاليزه ائتديگينيز بو دؤنمدن اينسانليق اوچون هانسي مدني ميراث قالميش؟ صفويلر دؤنمينده هم تورک، هم ده فارس ديلينده ادبيات سؤنموشدور. بير مؤولان، بير خاقاني، بير جامي، بير فوضولي بئله يئتيشمه‌ميشدير. فوضولينين اؤزو اعتيراف ائدير کي، اليشير نواي مکتبينين داوامچيسيدير.
صفويلر کيتابي ايسلام فلسفه‌سي و ايسلام تاريخي اوزرينه درين آچيقلامالارلا باشلاميشدير. بو بيلگيلرين اؤزو آذربايجان تاريخچيليگي اوچون چوخ اؤنملي اولماليدير.
چونکو ايسلامي ديه‌لرين تاريخي سورج ايچينده بوکولوب گئنيشله‌مه‌سي و سيياسته موداخيله‌سي چوخ اؤنملي مسله‌لردن بيريدير. اولايي صيرف قيزلباشلارين اسکي ايسلام اؤنجه‌سي تورک کيمليگينه باغليليغي يؤنوندن آچيقلاماق يانليش نتيجه‌لر دوغورا بيلر. بونون نتيجه‌سيني زاتن بيز آذربايجان جومهوريتينده گؤرمکدگيک.
سانکي آذربايجان-تورک تاريخي، يالنيز صفويلردن عيبارتدير و بونون ديشيندا هئچ بير تاريخيميز اولماميشدير. چوخ ماراقلي اولان بودور کي، "صفويلر" کيتابيندا قايناقلارلا گؤستريلر کي، شاه ايسماييلين نوه‌سي ايکينجي شاه ايسماييل باباسينين "معنوي" ميراثيني اورتادان قالديرماق ايسته‌يير و ايسلام بؤيوکلرينه سؤيوش سؤيمگي ياساقلايير.
تبرراچيلارين کوچه‌لرده هز. محمدين قادينينا، دوستلارينا لعنت گؤندريلمه‌سيني ياساقلايير. اونو صيرف بو اوزدن زهرله‌ييب اؤلدورورلر.
اؤز نوه‌سي شاه ايسماييلين تتبيغاتينا قارشي چيخميش، آنجاق گل گؤر کي، آذربايجان جومهوريتينين وطنداشلاري توتدوروب دورموشلار کي، شاه ايسماييلين هئچ بير خطاسي اولماميش، صوفي اولموش، اوزان اولموش، حاق عاشيقي اولموش، سرکرده اولموش، ائله اولموش، بئله اولموش!
حاق عاشيقي اولان حاقين ياراتديغي اينسانلاري هئچ بير سوچلاري اولمادان، اينانجلاريندان دولايي دسته-دسته قطعل ائدرمي؟ 14 ياشيندا چوجوق نه بيلير دؤولت ندير، دؤولتچيليک ندير؟ بيلمه‌ديگي اوچون گئتديگي يئرلري ياخيب يوخ ائدير.
ديپلوماتييانين نه اولدوغونو بيلميردي. قابا و کوبود داورانيردي. سولطان سليم تاختا چيخير، اونا تبريک مساژي گؤندرمير. شئيبانيني اؤلدوروب لئشيني لئشخور قيزيلباشلارا يئديزديرديکدن سونرا باشينين دريسينه سامان دولدوروب سولطان بايزيده گؤندرير.
قولونو کسيب باشقا بيرينه گؤندرير. بئله دؤولتلراراسي موناسيبتلرمي اولار؟ بودورمو اولوسلار آراسي ديپلوماسي؟ بئله وحشيليکمي اولار؟ آنجاق آنادولودان آخين ائدن قيزيلباش گوجو 14 ياشلي چوجوغون بو شيلتاقليغيني اؤرت-باسدير ائدير.
شاه ايسماييل
بوتون بونلار شاه ايسماييلدا يئنيلمزليک دويغوسو ياراتميشدي.
گئرچکدن او، اؤز ايچينده ايماملارين يئنيلمز و قوتسال روحلاريني داشيديغينا اينانميشدي.
چالديران مغلوبيتي اونون بو اينانجينين يالان، يانليش و باطيل اولدوغونو گؤستردي. اينسانلاري ظفر قازانديقلاري واختلاردا ديرلنديرمزلر، قلبه‌نين اؤزونمخسوس سرخوشلوغو وار.
مغلوب اولدوقلاري واختدا ديرلنديررلر. اينسانين گئرچک اينسانليغي و جؤوهري مغلوب اولدوغو زامان اورتايا چيخار.
چالديراندان سونرا شاه ايسماييل جانلي مئييته چئوريلير. يوخ اولور، چئوره‌سينده‌کيان کيچيک بيليکلردن ده قورخماغا باشلايير. قورخاغين بيري اولور.
چونکو اونون باطيل اينانجيني بو مغلوبيت ايفشا ائتميشدي. گئرچک اوزو بو مغلوبيتدن سونرا اورتايا چيخميشدي. آذربايجاندا شاه ايسماييلين گئرچک اوزونو گؤرمک ايسته‌مزلر. مغلوبيتدن سونرا اونون نئجه قورخاق بير حيات شکلي سوردويونو ديله گتيرمزلر.
آنجاق شاه ايسماييل هئچ ده قهرمان اولماديغيني اؤزو ده اؤز گؤزو ايله گؤروردو. بئله بير اينساني مودئرن دونيادا آذربايجان وطنداشلاري اوچون اؤرنک تاريخي شخصيت کيمي گؤسترمک ميلتلشمه‌نين اؤنونده بؤيوک انگل تؤره‌ده بيلر.
چونکو آذربايجان جومهوريتينده يالان و يانليشلا تصوير ائديلن شاه ايسماييل آديندا "عدالتلي!" ،"آذربايجانسئور!" ،"تورک کيمليگي ايله غورور دويان!" بير شخص تاريخده اولماميشدير. تام ترسينه قيزيلباشلارا خيانت ائدن و اونلاري دؤولتدن اوزاقلاشديران بير شاه ايسماييل گئرچگي ايله قارشي-قارشيياييق.
اورتايا آتيلان سواللاردان بيري ده بودور کي، تاريخي کيم يازماليدير؟ بئله بير يانليش فيکير وار کي، تاريخي تاريخچيلر يازماليدير.
تاريخچيلر د، اصلينده تاريخي خالق کوتله‌سي اوچون يازمازلار. آنلاشيلماز تئرمينلرله بير-بيرلري اوچون يازارلار. يازديقلاري کيتابلار دا کيتابخانالارين قفسه‌لرينده قاليب اوستونو توز باسار. آنجاق خالقين آيدينلانماسي اوچون يازيلان تاريخ کيتابلاري تاريخي سورقولاديغي اوچون هر زامان ماراقلا قارشيلانار. ايراندا دا ائله‌دير.
اسکي تاريخله باغلي کيتابلاري اوخويان يوخدور. چونکو رسمي ايدئولوژيلرين تاريخه باخيشيدير. پهلويلرين تاريخه فاشيست باخيشلاري اساسيندا يازيلان کيتابلاري کيمسه اوخومادي. آنجاق اؤرنک اوچون ناسير پورپيرار آديندا بير تاريخچي چيخير و پهلويلرين يازديرديقلاري کيتابلارداکي يالانلاري بير-بير تاريخي قايناقلارا داياناراق ايفشا ائدير و کيتابلاري الدن-اله دولاشير.
چونکو چاغيميزدا اينسانلارين آيدينلانماغا احتيياجي وار. مودئرن دونيا هر کسين تاريخ علمي ايله مشغول اولما حاقيني رسميته تانيميشدير. چونکو تاريخ يالنيز تاريخي وئريلردن و نقلياتدان عيبارت دئييلدير. اينسان دوشونجه‌سينين ياتاغي اولاراق دا تاريخ اينجلنمه‌ليدير.
دوشونجه و کولتورون کؤکو تاريخده‌دير. تاريخله اوغراشماق بير تور دوشونجه‌نين و کولتورون سرگوزشتي ايله تانيش اولماقدير. تاريخ اينجلنمه‌سي بير ده ياشايان نسلين فيکرن آيدينلانماسينا يارديم ائتمه‌ليدير.
آيدينلانما و چاغداشلاشما تمايولو اولاراق تاريخ اوغراشيسي مئيدانا چيخماليدير. بونا گؤره تاريخي اولايلارين آخراسيندا و آخارينداکي دوشونجه‌لري و اينانجلاري آچيقلاماق اؤزو-اؤزلوگونده بير صنعتدير، فلسفه‌دير. بو باخيمدان گونتاي گنجالپين "صفويلر" کيتابي آچيقلاييجي يؤنو ايله ده ديقتي جلب ائتمکده‌دير.
صفويتي تاريخيليک باغلاميندا اينجله‌ديگيندن دولايي اثر اوخوجونو هم آنادولو، هم ده ايران گئرچکلري ايله دريندن-درينه تانيش ائتمکده‌دير. اسکي تورک گلنگي، موغوللارين بؤلگه‌ميزه گليشي، خانيگاهلارين معنوي-سياسي گليشمه‌لرده‌کيروللاري حاقيندا کيتابدا آيرينتيلي بيلگي يئر آلميشدير.
بو، آزاد دوشونجه‌نين و هئچ بير ايدئولوژي آخيما باغلي اولمايان فيکرين اورتايا قويدوغو طرفسيز تنقيدي تاريخچيلکدير. بعضيلري بو اثرده عوثمانليجيليغين يئر آلديغيني ايديعا ائدرلر. آنجاق "صفويلر" کيتابيندا عوثمانلي دا تنقيد ائديلميشدير. گئرچک تاريخيازارليغي دا بودور. يوخسا بيريلرينين ساختا تاريخ دويغولارينا جاوابدئه اولماق اوچون يازيلان تاريخ کيتابلاري مودئرن تاريخچيليک آنلاييشي ايله اويغون گلمز.
تاريخ مني دوشوندورميه‌جکس، نييمه لازيمدير؟ قبول ائتسک ده ائتمه‌سه ک د، شاه ايسماييلين امري اوزرينه آدام اتي يئين دسته‌لر تشکيل ائديلميش و آداملاري ديري-ديري يئميشلر. لئشخور دسته‌لرين اولدوغونو صفوي قايناقلاري اؤزو يازير. بونون تک سوچلوسو دا شاه ايسماييلدير.
بعضيلرينين قالخيب سکيفلرده ده آدام اتي يئين اولموش کيمي ايفاده‌لرده بولونمالاري شاه ايسماييلين بو جينايتلرينه برات قازانديرا بيلمز. بو گئرچکلري بيلمک تاريخ شوورونون دوغرولار اوزرينده قورولماسينا زمين ساغلار.
بيزيم دينيميز موقدس ايسلامدير. ايسلام آدام اتي يئمگي ياساقلاميشسا، دئمک کي، شاه ايسماييل موسلمان دا اولماميشدير. اورتايا آتيلميش تصادوفي بير شخصدير. ايسلاملا، عيرفانلا، تسوووفله ده هئچ بير علاقه سي اولماميش.
صوفيليک، عاريفليک کيمي اؤزلليکلري ليدئرسيز ياشايا بيلمه‌يهن قيزلباشلار و داها سونرا سووئتلر شاه ايسماييلا يوکله‌ميشلر. عيرفاندا، تسوووفده نه زامان آدام اتي يئييلميش؟ نيفرتي و کيني تاريخيميزه گتيرن و سوسيال پسيکولوژيميزي نيفرته و اونا-بونا سؤيوش وئرمه کيمي سايقيسيزليغا غرق ائدن بير شخصي ميلتين تاريخي قهرماني کيمي نئجه گؤسترمک اولار؟ بيز هانسي عصرده ياشاييريق؟
تورکلوگوموزو و موسلمانليغيميزي نيفرت و کينله دولدوران صفويليگي مودئرن عاغليميزين محکمه‌سينده سورقولاماليييق. ايسلام اخلاقي و چاغداشلاشما دا بونو گرکديرر. چاغداشلاشما تاريخين قارانليقلارينا فرار ائتمک دئييلدير، تاريخين قارانليقلاريني آيدينلاتماقدير. "صفويلر" کيتابي بو باخيمدان تاريخيميزين قارانليقلاريني آيدينلادير و شام ايشيغيندا فيل تام اولاراق گؤرونور.
البتته کيتابدا تنقيد اولوناسي يئرلر ده وار. هز. الي () يولو ايله آنلاشيلان، يا دا آنلاشيلماسي گرکن ايسلاميت اوزرينه دورولماميشدير. هز. الي () شيسينين ايسلام و اينسانليق مدنيتينه وئرديگي تؤهفه‌لر حاقيندا کيتابدا بيلگي يوخ درجه‌سينده‌دير.
آنجاق ايسلام تاريخينده هز. الي () يولونون هللاج، نسيمي و ديگر بو کيمي بؤيوک شخصيتلر يئتيشديرديگي دانيلماز حقيقتدير. باخيلديغيندا هز. الي () صبري، هز. الي () خوشگؤروسو ايله شاه ايسماييلين هئچ بير علاقه سي اولماميشدير. صفويليگين گتيرديگي تخريبات هز. الي () بؤيوکلوگونو آنلاماق اوچون ده بير انگل اولموشدور.
http://www.azadliq.org/content/article/24624042.html
هیچ نظری موجود نیست:
ارسال یک نظر